Um­búða­laust / Á vís­um stað

Allir hlutir í geymslum eiga sér sögu og þá gildir einu hvort geymslurnar eru vel skipulagðar IKEA hillur eða rykfallnir skúrar, hvort umræddur hlutur vekur upp fortíðarþrá eða samviskubit, hvort hann kostaði 25 krónur árið 1972 eða 25.000 krónur árið 2021. Enginn veit lengur hvaða hlutir leynast í sumum kössum, samt var einhvern tímann tekin ákvörðun um að geyma þá. Hafa hlutir í geymslum ennþá gildi? Er gildið þá fjárhagslegt, sagnfræðilegt eða jafnvel tilfinningalegt? Getur geymsla orðið safn?

Sviðslistahópurinn Slembilukka ætlar nú að gramsa í geymslum landsins til þess að komast að því hvað fólk geymir og af hverju. Hlutunum sem þær finna verður svo komið fyrir á vísum stað, fyrir allra augum, í Borgarleikhúsinu.

Í geymslum liggja hlutir í dvala, en eru þó á vísum stað.

Höfundar og þátttakendur eru Bryndís Ósk Þ. Ingvarsdóttir, Eygló Höskuldsdóttir Viborg og Laufey Haraldsdóttir.

Á vísum stað er partur af Umbúðalausu verkefni Borgarleikhússins þar sem markmiðið er að styrkja grasrótarstarf í íslensku sviðslistalífi og efla tengsl nýrra sviðshöfunda við áhorfendur.